Project Description
Forma ta ofresé, konforme lei, hóbennan den e edat di 18 -24 aña e oportunidat pa tuma parti na trayektonan di formashon i edukashon (máksimo 24 luna). E idioma di instrukshon na Forma ta Papiamentu. Aki ta persiguí e siguiente metanan:
- Optené un kalifikashon básiko pa e merkado laboral lokal (diploma MBO nivel 1) i òf;
- Ku ta hiba na un trabou permanente òf edukashon superior;
- Konservá un trabou i kompletá e edukashon superior;
- Pa e partisipantenan di kual nada anteriormente menshoná ta realisabel (LVB- problematiek), ta duna un training di independensia den koordinashon ku sosionan di kadena involukrá.
En konekshon ku siguimentu di enseñansa regular i den preparashon pa e trayekto prinsipal, durante 10 luna e studiantenan ta sigui e trayekto básiko. Durante e dos promé periodo nan di e aña eskolar, e studiantenan ta presente na FORMA durante 5 dia pa siman. Ta adaptá permanentemente e plan di estudio na e demandanan di e sosiedat i e nesesidatnan di e grupo di enfoke.
Tin espasio pa un máksimo di 20 studiante den e trayekto básiko, den kual e Trahadó di Formashon Edukativo (EVW-er) i un asistente (OA) ta forma parti di e grupo. E trayekto Básiko ta un trayekto formativo dirigí riba tantu e desaroyo personal komo profeshonal di e hóbennan. Pa medio di tareanan di un portafolio orientativo, vinkulá na e 9 kompetensianan, e studiante ta deskubrí ken e ta, ki talento i kualidatnan e ta poseé, unda su interesnan ta sintá, e ta desaroyá un struktura diario i un ritmo di dia i anochi i e studiante ta siña kon pa siña. Di e manera akí, e hóben ta desaroyá persepshon propio, konosementu i un vishon realístiko di futuro.
GUIA LABORAL
E trayekto di guia laboral ta enfoká riba buska, haña i mantené trabou. E studiantenan ku skohe pa bai traha òf pa motibu di problemanan kognitivo o personal no por bai MBO nivel 1, ta risibí apoyo den su desaroyo personal i profeshonal i ta pone un base di konosementu general i abilidatnan sosial. E trayekto ta usa diferensiashon mas tantu ku ta posibel i e partisipantenan ta haña un oferta ku ta permití nan desaroyá optimal basá riba nan antesedentenan, kapasidatnan i interesnan. E struktura di e trayekto pa gran parti ta práktiko i ta enfoká su mes den siñamentu di abilidatnan laboral básiko. E trayekto tin un durashon di mínimo seis aña, i ta konsistí di 3 fase i e hóbennan ta drenta e merkado laboral.
Den fase 1, ta brinda enseñansa 2 dia pa siman durante un mínimo di seis luna na e lokalidat di FORMA, bou di supervishon di e Trahadó di Formashon Edukativo i un asistente. Durante e 3 otro dianan restante, e studiantenan ta bai un lugá di trabou kaminda nan por atkerí eksperensia komo trahadó. Si e studiante tin trabou kaba, e lo tin ku traha e 3 dianan akí einan mes. Durante e dianan ku e studiante ta trahando na su lugá di trabou, e Trahadó di Formashon Edukativo i òf e asistente ta presente regularmente na e lugá di trabou.
E grupo tin un kapasidat máksimo di 15 studiante. E plan di estudio ta konsistí di e siguiente materianan i e kontenido ta enfoká riba e kompetensianan, ku ta basá i kombiná ku e training Kaminda pa Trabou i ku ta ser tradusí den práktika den un ambiente laboral. E kontenido di e temanan ku ta menshoná na kontinuashon ta ser tradusí mas tantu posibel na un situashon laboral konkreto.
E Trahadó di Formashon Edukativo i e asistente ta duna guia di trabou intensivo i strukturá. Esaki tin un frekuensia fiho i adaptá na e demanda i nesesidatnan tantu di e studiante komo ku di e doño di trabou. Tambe ta realisá akuerdonan na midí tokante aksesibilidat durante i despues di orarionan di ofisina.
Den e lastu fase, ku tambe ta dura por lo ménos 6 luna, e meta ta pa “mantené un trabou” i perpetuá i konfirmá loke a siña.
E frekuensia di supervishon ta tuma lugá na e lugá di trabou.